مساء الخير زملائي الاعزاء في جروب جدول عام 😊
⬅️استكمالا لما بدأناه في البوست السابق الاسرة ببساطة
انهاردة هنتكلم عن الاجراءات العملية المتشابهة في غالبية دعاوي الاسرة علشان ما نكررش الكلام فيها تاني في كل بوست قادم
ونركز جهدنا الفترة الجاية علي صيغ دعاوي الاسرة المختلفة
والمستندات المطلوبة في كل دعوي وما الذي يجب عليك فعله كي تكسب دعواك
⬅️الاجراءات العمليه في دعاوي الاحوال الشخصية
✍️مبدئيا كده لا يجوز لك ان ترفع دعوى احوال شخصيه
من غير ما تلجأ لمكاتب تسويه المنازعات الاسرية
✍️مكاتب التسويه موجوده بكل محكمه اسره يعني عندك مثلا مكتب تسويه الخليفه مكتب تسويه الموسكي مكتب تسويه عين شمس وهكذا.
لو ما حصلش ولم تلجأ الي مكاتب التسويه المحكمه هنا بتقضي بعدم قبول الدعوي
👈وانت رايح مكتب التسويه بيكون معك حافظه مستندات فيها الاوراق الخاصه بالموضوع
زي عقد الزواج
وثيقة الطلاق
شهادات ميلاد الصغار وهكذا
💡وبتكتب طلب مقدم الي لجنة الشئون الاسرية وصيغة الطلب المقدم بسيطة هنكتبها في البوستات الجاية مع صيغ الدعاوي
⬅️مكتب التسويه هيديك استمارات بيانات منازعه بتملاها
الاستمارات بيكون مكتوب فيها
نوع الدعوي تكتب (نفقة زوجية مثلا )
أسباب النزاع تكتب (امتناع عن أداء نفقة زوجية)
الغرض من طلب التسويه (فرض نفقة علي الزوج )
مقترحات مقدم ال طلب بخصوص التسويه ( حل النزاع وديا )
ما يركن اليه مقدم الطلب في الاثبات(أحكام القانون مثلا )
بيان المستندات المرفقه بالطلب( صورة ضوىية من عقد الزواج او وثيقة الطلاق او شهادات ميلاد الصغار )
مقدمه لسيادتكم ( فلان المحامي )
توقيع مقدم الطلب ( توقيعك )
⬅️في ظهر الاستماره بيكون مكتوب بيانات اطراف النزاع بتملاها
واحسن حاجة تعملها انه يكون معاك النماذج دي وتكتبها وانت في المكتب بدل ما تعطل نفسك في المحكمة وتضيع وقت
💡بعد ما مليت الاستمارات وظبطها 📝
💡مكتب التسويه بيقيد رقم الطلب عنده و بيحدد لك جلسه
لو الاطراف حضروا وتم عقد اتفاق والنزاع اتحل بشكل ودي كان بها
💡ولازم ناخد بالنا من حاجة الاتفاق اللي بيتم في مكتب التسويه زيه زي الاحكام القضائيه يعني ممكن ببساطة أخد عليه صيغة تنفيذية وامشي في اجراءات التنفيذ
بس في مشكله في عقد الاتفاق
اولا :عقد الاتفاق ده ما ينفعش ارفع بيه دعوي حبس
ثانيا :ما ينفعش انفذ بيه في بنك ناصر
⬅️طيب لو مكتب التسويه حدد جلسه وما حدش حضر من اطراف الدعوي بيحدد لك جلسه ثانيه ولو محدش حضر ف فبيتم غلق الملف
⬅️هنا بقي اصبح متاح ليك رفع الدعوي
بتكتب العريضة بتاعتك وتتوجه بيها لمكتب التسوية تاخد معلومات عليها تفيد انك لجأت الي مكتب التسوية بطلب رقم كذا .
⬅️وبعد كدة بتروح ترفع الدعوي بالطرق المعتادة التوجه لرئيس القلم لمراجعة الاوارق وتقدير رسم ثم التوجه للجدول لقيد الدعوي وتحديد جلسة ثم ختم صحيفة الدعوي من قلم الكتاب وبعد كدة التوجه للمحضرين للإعلان بأصل الصحيفة
📜 يوم نظر الجلسة
👈لو المدعي عليه تم اعلانه بشخصه ولم يحضر الجلسة المحكمة بتقضي بالإعلان بعرض الصلح فقط
👈أما لو المدعي عليه تم اعلانه مع جهة الادارة او مع تابعه او خادمة المحكمة بتقضي بإعادة الاعلان وعرض الصلح
وبعد كدة بيتم تداول الدعوي في الجلسات
⬅️هنا بتتشابه معظم دعاوي الاحوال الشخصية في الاجراءات بتاعتها
⬅️التركيز في البوستات القادمة ان شاء الله هيكون علي صيغ الدعاوي والمستندات المطلوبة وازاي تكسب الدعوي
#جدول_عام
#منصة_تعليمية
#شباب_المحامين
