مساء الخير زملائي الاعزاء 🙂🙂
يارب تكونوا بخير 😌😌
اتكلمنا قبل كده عن الهيكل التنظيمي للمحاكم في بوستين
البوست ده مخصص بس بالوظائف والاعمال الادراية
اللي حضرتك بتقوم بيها في المحكمة والمصطلحات اللي
بنشوفها كل يوم في المحاكم
لو حضرتك ادركت المصطلحات دي كويس جدا يبقي
كده المحكمة كلها في جيبك ومش هتوه تاني
البروتستو:💿💵💴💶
مختص بالدعاوي التجاريه وده المكان اللي بيطلع منه الورقه اللي بتثبت ان الشخص اللي انا عايز اشهر افلاسه مدفعش الكمبياله.
الاجنده: 📚📚
اللي بيتسجل فيها كل اللي تم في الجلسه و ارقام الحصر و بنعرف منها القرار السابق للجلسه
و بتبقي موجوده مع سكرتير الجلسه بنعرف منها الرول
الاجنده دي بيبقي محدد فيها الجلسه باليوم يعني لما تروح تسال هتسال وتقول مثلا :-
لوكانت الجلسه محدد ليها تاريخ
تشوف اليوم مثلا:-
ده موافق يوم ايه ....يوم الخميس يبقي تدخل وتقول اجنده الخميس مع مين وتشوفها مع سكرتير الجلسه بتاريخ الجلسة .
الجدول: 📒📒
مكان التواجد :ده بيبقي موجود فى المحكمة وده بيتسجل فيه القضيه من اولها لاخرها من ساعه مادخلت المحكمه لحد ما وقفت.
دفترالحصر:📕
وده اللي بيبقي موجود فيه لو كان المتهم عمل معارضه من عدمه او استأنف وده بيبقى فى غرفه التنفيذ بتجيب الرقم بتاع الحصر من اجنده السكرتير او الجدول
دفتر الصادر والوارد: 📗📘
بيبقي مختص باستلام وارسال ملفات القضايا اللي بتروح للخبراء وبترجع منها او بتروح محكمة تاني درجة او النقض واستلام المحاضرمن القسم وبيبقي موجود في (غرفة القيودات)
رئيس القلم:✒✒
وده هو رئيس السكرتاريه بتوع الجلسات واللي بيبقي معاه الاختام
بتحدد من عنده الرسم لما بترفع الدعوي
بتختم من عنده أي ورق متعلق بدايرته
امين السراو(سكرتيرالجلسه): 📖🖋
ده السكرتير اللي بيكتب ورا القاضي
بيبقي معاه الاجنده بتاعه اليوم والجلسه
لما تيجي تاخد صوره رسميه من محضر او الحكم بيبقى من عنده
وبتعرف من الاجنده بتاعته القرارات والاحكام .
رئيس المحضرين: 📄📄
رئيس المحضرين اللي لما بتيجي تسلم اعلان بتسلمهوله وبتاخد من عنده الرقم بتاع المحضرين
المحضر:📩✉
ده اللي بيشتغل تحت ايد رئيس المحضرين واللي بينزل يعلن الخصوم في موطنهم
وكل محضر بيبقي مسئول عن منطقة معينة في دايرته.
قلم الصور: 📸📸
المكان الذي يتم منه استلام الاحكام المنسوخه. يعنى لو هتاخد صورة رسمية من حكم بتستلمها من السكرتير وبعد التصوير بتروح تاخد رقم من قلم الصور على الحكم وكزلك الشهادات من الجدول واي ورقة رسمية بتاخدها من المحكمة لازم تعدي علي قلم الصور.
:دفتر الاحوال 📘📘
وده موجود في القسم واللى بيتسجل فيه المحاضر اللي دخلت القسم بارقامها
الاستيفاء:🔗🔗
مكان التواجد :في القسم والمحكمه وده عباره عن مجموعه من امناء الشرطه اللي لو في اجراء ناقص او خانه مش تامه في المحضر هما اللي بيكملوها
مثال:
زي مثلا لما تروح تقدم بلاغ ضد شخص ومش عارف غير اسمه ثنائي وظيفه الاستيفا
انه بيبعت امين شرطه بيستوفي الاجراءات دي يعني الاسم ايه وطبعا من العنوان.
وفي حالات اجراءات المعاينه برضه بتبقي من الاستيفاء
الاستيفا ملهاش دفتر دي عباره عن غرفه فيها الامناء بتوع الاستيفا وبنعرف ان كان المحضر لسه في الاستيفا ولا لا عن طريق الاجنده .
الفهرس: 🖥🖥
ده انت بتعرف منه ان كانت في قضايا مرفوعه ولا لا يعني ده اللى بيرتب القضايا اللي داخله للمحكمه وبتطلع بالاسم اللي حضرتك عايز تعرف ان كان في ضده نزاعات او قضايا ولا لا ؟
