( سجل اعمال المحامي )
السلام عليكم ورحمة الله وبركاته :)
اي مهنة في الدنيا بيكون ليها فنيات محدش بيعرف يعملها غير اهلها واصحاب التخصص فيها .. ونفس المنطق في مهنة المحاماه ⚖️
مهنتنا ليها اصول وتفاصيل الموكل مش بيكون عارف هي بتتعمل ازاي ولا هي فين موقعها اثناء سير الدعوي .. المحامي المبتدئ اثناء مرحلة التدريب كل ما عليه انه يبدأ يعرف كل تفصيله في الدعاوي المختلفة .. هو متابع جيد لاستاذه لانه معلمه الاول واللي بيستقبل منه اصول المهنة 👍
بس حابين نوضح لكم نقطتين في غاية الاهمية لو بدأت تعملهم من بداية عملك بالمحاماه هتلاقي عندك حصيلة رائعة جدا بعد الانتهاء من مرحلة التدريب .
اولا : تصميم نموذج الدعوي
من البداية خلي عملك يكون بناء علي النماذج .. بمعني انك لو هتشتغل في دعوي حاول تعمل ورقة A4 تكتب فيها كل الاجراءات اللازمة للدعوي .. كل اللي مطلوب منك انجازه في الجلسات والاعداد ليها .
كل معلومة بتستقبلها هي في الحقيقة خطوة في تسلسل كبير محتاج تعرف الخطوة ده ليه عملتها وايه قبليها وايه بعديها .
ولك ان تتخيل انك بعد ما تخلص مرحلة التدريب .. تلاقي عندك حوالي 100 نموذج لدعاوي مختلفة انت اشتغلتها وعارف جميع اجراءاتها وايه المطلوب منها .
ولان المحامي لازم يكون واضح مع موكله النموذج ده هيسهل عليك تفاصيل كتيير اثناء نقاشك مع موكلك ويوضحله قد ايه انت محامي متمكن من شغلك وعارف موضوعه اوله ايه واخره هيكون ايه .
ثانيا : اعداد كراسه الخبرة
ضروري تكون عارف ان معرفتك بالدعوي معرفة كاملة مش هيؤهلك انك تكون محامي ناجح .. الامر محتاج منك اعداد كراسه الخبرة .. واللي هتدون فيها كل التركات اللي هتخليك متفوق عن غيرك في جلب الحق ونصرة المظلوم او حتي ضمان الحقوق .
لما هتبدأ رحلتك في المحاماه هتعرف ان في اجراءات مناسبة جدا وطبيعي تعملها بس كان اولي تعمل حاجة تانية كخطوة استباقية لضمان حق .. هتعرف انك ممكن تموه بإجراء لتفويت الفرصة علي الخصم من انه يوقعك في غلط انت في غني عنه بخطوة كنت لازم تاخدها اثناء سير الدعوي .
وده اللي هتتعلمه من استاذك ولو هو محامي محترم مش هيبخل عليك بل العكس هيفهمك ويوضح لك الحنكة من بعض الاجراءات .
وزي ما بيقولو لكل شيخ طريقة .. ده انت محتاج بكل قوتك تعرفها وتمارسها كمان طوال مرحلة التدريب .
خليك من بداية عملك بالمحاماه ذكي وبتحاول تكون مختلف .. ركز ان رحلة تدريبك تكون مرحلة ممتعة وحصادك فيها مش قليل .
المحاماه قبل ان تكون مهنة هي فروسية محتاج تكون فيها محارب عن الحق بكل شجاعة .. والشجاعة تستلزم منك علم ومعرفة لان ده سلاحك الوحيد :)
#جدول_عام
#منصة_تعليمية
#شباب_المحامين
